KPK Teuka u Aceh, Pejabat Meukhot-Khot Tuot

Irwandi Yusuf ditahan KPK (Faiq Hidayat/detikcom)

Teunuleh Husaini bin Mahyeddin

Puhaba syedara lon bansa Aceh? Lon harap Rabbon teutap geubri sijahtra keutanyoe mandum, walaupih Aceh daerah paleng gasin di Sumatra, dipeugah le tukang peugah haba nibak surat haba yang dituleh uleh wartawan yang uleh padim-padim droe ureung dipeugah seubagoe lalat mirah. Nyang kheun nyan salah sidroe jih nakeuh Keuchik Gampong Simpang Jaya, Kecamatan Juli, Bireuen, Edi Ikasah. Nibak lon kalon ruman, keuchik nyan nakeuh simpatisan Irwandi Yusuf, Ule Pomerintah Aceh yang ka dicaruh uleh KPK.

Tanggai 3 Juni 2017, adalah tarekh yang hanjeut dilupa uleh pejabat rayeuk di Aceh, nibak tanggai nyan Ule Pomerintah Kabupaten Bener Meriah Ahmadi, nyang sigohlom jih adalah musoh aktipih lingkungan udep dan maphia gadeng gajah, dicaruh le KPK wate diwoe bak saboh rapat peureute di Takengon. Sigam nyan dan Irwandi Yusuf lheuh dipareksa di Polda Aceh, dipupho u Jakarta. Awaknyan mandua dicaruh karena dipeugah dichok seubago bandet yang maen bagi-bagi peng kupi DOKA Aceh 2018 bak peuroyek peugot rauh Krunggeukuh-Bandara Rambele.

Lam keunarang nyoe, sengaja lon tuleh ngon bahsa Aceh jaman now, nak bek jeut dibaca uleh awak blahdeh laot. Nyoe haba hanjeut ditupu uleh awak Jakarta, pulom KPK. Pakon meunan? Karena hana mandum suwah diteupu le awak nyan.

Hai ngon, lheuh dicaruh Irwandi dan Ahmadi, KPK kamulai dijak pareksa rata kantoe, mulai dari ULP Aceh, PUPR Aceh, Dispora Aceh dan buno beungoh dijak pareksa Dinah Pendidikan Aceh.

Dari haba nyang ka troh baklon, jai that bukti yang suwah dipeusapat uleh KPK, karena wate di OTT Irwandi dan Ahmadi, awaknyan hana keumah dipeusapat bukti lom. Pakon teuma di OTT? Hai meunyo hana di OTT mandum bukti akan dipeuhanco uleh pancuri tujoh nyan na di kanto pomerintah. Nyankeuh nyan tujuan di OTT.

Teuma na padim droe apa Aceh yang demo lake KPK peulheuh Irwandi, nyan teunte na udeung dimiyub bate, sebab gohlom na pungoe ureung Aceh sigohlom jih geujak intervensi hukom kiban galak-galak droe. Nyan peukateun hana pah sagai, walau nyan bagian daripada hak ureung maseng-maseng di dalam nanggroe deumokrasi lage nyoe rupa. Angkeuhnyo mangat that tahudep lam nanggroe deumokrasi, dumpu jeut tapeulaku, kiban galak droteuh.

Lam tulesan nyoe lon keuneuk peugah, kareuna KPK ka teuka u Aceh dan teuga that diwet-wet rata kantoe, ubena peujabat di Aceh lom kalon ka siaga sa. Awak nyan kamulai meurateb wate suboh uroe dimeulake bak Allah bek keuh keunong drop. Ubena nyang ka leupah dicu, akan dipulang. Tapi pukeuh Allah akan neukabol doa meunan? Homlah, tapi bak dali han sang, karena janji awak nyan lage janji kleng lam laot raya wate teungoh geulumbang rayeuk.

Tuot peujabat rayeuk di Aceh ka meukhot-khot jino siat. So nyang dikalon sang-sang awak KPK. Dikalon ureung agam meukacamata, pih dipike tukang peugah haba KPK Febri Diansyah.

Jino meuno mantong, bak rata meulasah neupubut doa tulak bala, karena yang cu peng otsus Aceh nakeuh but yang paleng brok karena dirampok peng nyang dibie ateuh nan manyet konflik. Semoga Allah bagah geulungkop peureute pancuri tujoh.

Teuma soai Bang wandi, meunyo gobnyan beutoi diramah dan dijeubak, semoga Allah geulurong gobnyan sigra. Tapi miseu gobnyan but geuh memang geucu peng otsus, bahkeuh beubagah geugulong uleh Allah, karena nyan duro lam asoe.

Peureulak, 10 Juni 2018
Husaini bin Mahyeddin
Alamat dan identitas na nibak redaksi.