Haba Keu Ureung Syiek GAM

Teunuleh Husaini bin Mahyeddin*)

Lon peuphon kalam deungon horeumat nyang teuleubeh keu ban mandum ureung syiek Geurakan Atjeh Meurdehka (GAM) yang mantong na sidro sapat teuk di ateuh rung donya. Seumoga uleh Allah geubri sijahtra keu ureung droneuh nyan ban mandum.

Nibak tanggai 3 Juli barosa, Teungku Agam nyang geuduk seubagoe Ule Pomerintah Atjeh yang lam tataneugara Indonesia dikheun gubernur, kadibeureukah uleh KPK RI, lam Operasi Drop Jaroe (ODJ) nyang dikheun uleh awak nyan OTT. Nyoe adalah sijarah baro bagi geutanyoe Atjeh lheuh dame, dile Abdullah Puteh Gubernur Aceh di masa prang, didrop cit uleh KPK kareuna korupsi yum heli Cem Pala Kuneng.

Teunte, korupsi aliah cu peng rakyat bukonkeuh but jahe nyang jeut tapeulaku sidroe, nyan but suwah tapubut rame-rame dan sipatotjih ditume uleh BPK RI, tapi aleh pakon dari 2008 ka Dana Otonomi Khusus Aceh (DOKA) kamulai dicue, tapi BPK teutap dibrie opini WTP keu Pomerintah Aceh, siulah-ulah hana kejadian sapue di nanggroe nyoe.

Kalinyoe lon keuneuk peugah, dari thon 2008 sampoe 2017 56 triliyun leubeh peng kadijok uleh Pomerintah Pusat keu Atjeh, nyan nakeuh peng Otonomi Khusus yang diawai geukheun peng pampasan prang uleh ureung chiek GAM nyang meureundeng ngon RI di Helsinki dan geumeudame nibak tanggai 15 Agustus 2005, alheuh geulumbang raya dipok Banda Aceh dan padum-padum wilayah laen di Aceh.

Kheun ureung tuha awai, peng Atjeh meukuyan, tapi ureung Atjeh lage gaseng keunong sawan, umpama manok teubi bakong, seurupa iblih teusiram Quran. Sidipnan peng Otsus Atjeh, nanggroe nyoe teutap juara daerah paleng gasin di Sumatra. Nyo teunte lage manok deuk lam kroeng pade.

Ilon keuneuk peugah lom, seulawet nyoe nyang na diteupu peugah awak GAM diolah peng otsus 650 milyar, walau nyan beutoi tapi cara dipeusalah sang-sang tok awak GAM yang na ceumeucu, nyan pih gohlom diaudit, sangkira kon gara-gara Toto Zaini, meuso teupu tan. Miliyun-miliyun laen nyang hana meuho hana so gabuk, troe awak dinah diyok-yok droe ngon peng cu, hana so paduli, di Aceh lage kahanale polisi, awak nyan kalage pramuka, lage miong troe, tikoh meuwet-wet dikeu mata, tan dipeureumeun sapu.

***
Nibak surat haba kalinyoe, ulon keuneuk peugah hoka dum ureung syiek GAM? Hoka Teungku Bakhtiar, Teungku Malek Mahmud, Teungku Nur Djuli, dan laen-laen yang mantong na marwah. Apa Karya yang galak that peugot tamselan lam bahsa Aceh, hogeuh, aci peuteupat siat. Teungku Nasruddin bin Ahmed, hogeuh ka?

Aneuk mit lam GAM kalage aneuk gadoh ma, hana dituho le rauh woe u rumoh, kabeh dok dum ngon peng griek, aleh dipike peng nyan jeut puwoe lam uruek.

GAM kajeut peusaboh droe, kareuna jai that butir MoU Helsinki nyang gohlom neupeutamong lam UU RI, nyan UU Nomor 11 Tho 2006 Teuntang Pomerintah Atjeh pih bacut-bacut kadipeulaku lage meuneuheut toke maseng-maseng.

Lon keuneuk peugah, so mantong nyang ceumeucu sambelan publoe perjuangan, bah beudidrop, kon cuma Irwandi, tapi nyang olah beasiswa Aceh 2017 dak meujeut beudibeureukah uleh KPK. Ban mandum peulaku korupsi hana peureule bela.

Ureung chiek GAM harus peusapat lom urueng nyoe dan peuingat keulayi tujuan perjuangan, sigohlom habeh mandum beukaih kombatan GAM dikeulola uleh agen-agen nyang na misi peubicah tujuan GAM untuk peumaju bansa Aceh.

Neumeusaboh droneuh Teungku! Bek lale, uroe karap seupot, reudok ka di ule gunong, sure karap habeh eh, keubeu ka putoh taloe. Krue seumangat, woe, woe u rumoh droe, nyang salah tepuebeutoi, nyang beutoi tapeujak, nyang brok tatanom, nyang beutoi tabila.

Nyang tuleh nyoe ureueng Peureulak, Atjeh Timu.

Asai gamba dicok nibak koleksi GAM yang kadisipreuk nibak internet.