Abu Razak: Keu DPRA ngon DPRK, PA Wajeb Meunang, NasDem Tabi Bacut

ACEHTREND.COM, Banda Aceh- Keurani Jeundral Pusat Peureute Aceh (PA) Kamaruddin atawa nyang seureng geutawok ngon nan Abu Razak, Hameh (24/1/2019) geupeugah bahwasajih, keu Pileg 2019, PA haruih meunang mayoritas di Aceh. Bah pih meunan, gobnyan teutap geupeugah keu NasDem teutap tabi bacut.

Bhah nyan geupeugah uleh Abu Razak, wate geupeusampo haba bak acara Deklarasi Sekber Caleg NasDem DPR RI seureta Sekber Pemenangan Jokowi-Ma’ruf di Aceh, Pango, Banda Aceh.

Lam narit nyang geupeusampo lam basa Aceh ngon basa Meulayu langgam Indonesia, yang that meuaceh, Abu Razak, dikeu Paduka Yang Mulia Wali Nanggroe Aceh Teungku Malik Mahmud, seureuta Dikeu Keutuha Umum DPP NasDem Surya Paloh, seureuta ribe jamee nyang laen, bahwa darah gobnyan teutap mirah. Cinta geuh keu PA hana gadoh.

“Meusaboh ngon NasDem keu DPR RI nakeuh saboh rauh untuk perjuangan meukeusud Aceh jak kawai hase MoU Helsinki yang gohlom dipasoe lam UU Lumboi 11 Thon 2006 Teuntang Pomerintah Aceh, nak ditamah lam UU RI,” kheun Abu Razak lam basa Indonesia.

Untuk meukeusud nyan, peut droe kader organik Peureute Aceh geukirem untuk saban-saban lam NasDem keu DPR RI. Peut droe ureung nyan nakeuh Jufri Hasanuddin, Anwar, Incit Ketuha DPRA Teungku Muharuddin dan Evendi.

Keu pileg 2019 di Aceh, untuk DPRA dan DPRK hana damee, teutap PA haruih meunang beujai that. Bah pih meunan Abu Razak teutap geupeugah keu NasDem teutap geubi bacut. Han mungken cit keu PA mandum. Keu Golkar bacut, nyang gara narit nyan, “meupingkom” geukhem ureung.

Target nam boh kurusi keu DPR RI, bukonlah hai nyang mustahe. Abu Razak geupeugah lom, seulaen keu NasDem, kurusi u Senayan beuna cit keu Sulaiman Abda dari Golkar. Sigoe teuk, ureung rame meujungkat geukhem. Surya Paloh, Malik Mahmud, Zaini Djalil seureuta Sulaiman Abda, grah bak geukhem. []

KOMENTAR FACEBOOK