ACEHTREND.COM, Banda Aceh – Meulinte Presiden RI Ir. Joko Widodo, Bobby Nasution, Hameh malam (24/1/2019) poh 22.28 WIB, dipeutrang hai ayah tuan jih nyang dipeugah kon Iseulam uleh sitre politik.
Di keu ureung rame lam acara jeip kupi malam, Bobby nyang dipakek jaket, dipeugah jih peurnah geucuba seumayang (shalat-red) uleh Jokowi bak saboh uroe.
Nibak wate nyan, Bobby jak u rumoh Jokowi. Pah dikeuneuk wo kareuna karab Mugreb. Nibak wate nyan, han geubi barih dile uleh Jokowi. Rupajih Bobby geuyu dong imum. Jokowi ngon anggeta keluarga nyang laen jeut keu makmum.
“Rupajih wate nyan ulon geuneuk tes jeut seumayang pu han. Meunyo hanjeut seumayang, kakeuh habeh hubungan ulon ngon aneuk gobnyan,” kheun Bobby lam basa Indonesia.
Wate kalheuh nikah, dipeugah lom uleh si Bobby, awaknyan seureng meusapat di Istana Bogor. Teumpat jih di saboh mess di sampeng istana.
Jokowi bah pih kajeut keu Presiden RI, hana geu eh bak istana. Gobnyan geutinggai bak mess nyang dua boh kama, di sampeng istana.
Wate meusapat rame-rame riyoh that-that. Joko Widodo nakeuh ayah tuan nyang ramah seureuta galak peugah haba ngon aneuk seureuta meulinte.
Wate jak eh malam, Iriana seureuta mandum nyang inong jak eh lam kama. Peureute nyang agam sajan Jokowi bak ruang laen. Adak nyang kana lakoe han geubi eh sapat, karena nak lot mandum.
“Wate suboh Bapak geupugoe kamoe mandum. Geuyu shalat suboh. Hana calitra han tem beudoh, kareuna Bapak wate geuyu beudoh jak tung ie seumayang, ie muka geuh seuriuh that,” kheun Bobby.[]
