Walikota Banda Aceh Peuingat Aneuk Muda: Bek Peuraya Valentine Day

ACEHTREND.COM, Banda Aceh – Walikota Banda Aceh Aminullah Usman, Rabu (29/1/2019) lam seunurat peuingat geupeugah han geubi peuraya uroe Valentine Day. Seubab ata alah nyan nakeuh budaya mungkar nyang po jih ureung kaphe.

Haba nyan geupeusampo lam seunurat angen (email-red) nyang dikirem keu aceHTrend uleh awak Humas. Nibak seunurat nyang geuteken bak tanggai 21 Januari 2019, Aminullah geupeugah hanjeut peuraya Valentine Day 14 Januari.

Tujuan geupeutubit seunurat peuingat nyan nakeuh untuk geujaga aqidah dan amai syariat Iseulam di Banda Aceh.

Na dua boh hai nyang jeut keu meukeusud geunak peugah lam seunurat nyan. Phon, keu aneuk muda inong ngon agam, dari SMP sampoe kuliah nyang na di Banda Aceh, hanjeut jak peugot acara Valentine Day lam rupa meusapupih. Kareuna ata alah nyan hana lam agama Iseulam sereuta that brat geularang.

Nyang kedua, keu po atawa tukang keurija nibak rumoh peuniyoh siat (hotel, losmen, wisma), keude kupi, teumpat jak peuseunang hate seureuta teumpat ploh bron wate suntok, hanjeut peugot acara atawa hanjeut bi teumpat keu awak nyang peugot acara Valentine Day.

Meunurot asoe seunurat peuingat nyan, pu nyang geutham nyan nakeuh ujud padoli lam bhaih peukong syariat Iseulam di Banda Aceh. Seubago kota geumilang, Banda Aceh hana maen-maen bak but peukong syariat.

Walo pih meunan, lam seunurat nyan hana geutuleh sanksi keu nyang langgar. Pukeuh keunong cinut, atawa keunong sitrap dari pomerintah.

KOMENTAR FACEBOOK