Dihambo Atalanta 3-0, Juventus Meujungkat Ikue dari Coppa Italia

Ronaldo, brat that weuh hate kareuna Juventus dilamon uleh Atalanta 3-0, Hameh (31/1/2019). Foto: Reuters

ACEHTREND.COM, Bergamo- Hameh (31/1/2019) lam Stadion Atleti Azzuri d’Italia, Juventus nyang ka dithe le kaphe seubago klub bola paleng hayeu di Italia, dihamok uleh Atalanta 3-0. Ronaldo nyang seulawet nyoe dipujo seubago bintang paleng hayeu, hana deuh carong nibak kalinyo.

Uleh seubab ditakat 3-0 uleh Atalanta, Juventus kajeut woe u gampong, kareuna ka meujungkat ikue dari Coppa Italia.

Lhe neuk gon nyang dipeulop lam gonbhan Juventus nakeuh but Timothy Castagne bak minet 37, alheuh nyan dua neuk teuk dipeulop uleh Duvan Zapata bak minet 39 ngon 86.

Bak sipak bhan kalinyoe, Juventus nyang kayem ditawok seubagoe Nyonya Tua (hana lom meurumpok padanan nyang pah lam basa Aceh-red) padahai dipeutron lhe droe pemain trisula, nakeuh Federico Benadeschi, Cristiano Ronaldo, seureuta Paulo Dybala di bareh keu.

Sayang that-that, lhe droe awak nyan nyang ka dianggok uleh donya, han keumah sapue kalinyoe. Kheun awak nonton lage hansep dipajoh bu beungoh. Dari minet phon dimaen sampoe seuleuso, sigo sagai disipak bhan nyang pah u gawang. Seuleubehnyan , lage na lam tivi kiraju.

Massimiliano Allegri, nyang dipeuduk keu ule mualem Juventus, suwah dipeh ule. Dijih han abeh dipike curak maen awak Juventus lage ureung hansep gizi.

“Nyoe nakeuh nyang paleng brok seulama jih gabong ngon Juventus,” kheun Allegri, han abeh dipike.

Sebeutoijih, Allegri diharap na tuah dari Ronaldo. Tapi sigam nyan pih lage ureung rhot roh wate dimaen bhan. Hana meusineuk pih bhan nyang jih sipak pah keunong u gawang Etrit Berisha. Padahai bak musem nyoe ka 17 neuk jih dipeulop bola lam gon bhan gon lam padum boh macam kompetisi.

Striker 33 thon nyan dari phon sampoe seuneulheuh cuma dipeulheuh dua go tembakan. Meusaboh pih hana nyang pah.

Kareuna taloe kalinyo dari Atalanta, Juventus diwoe laju u gampong.

“Kabeh kamoe bak turnamen nyoe,” kheun Allegri, ngon muka lage rangoe meunan. []

KOMENTAR FACEBOOK