That Na Teuh! Hambo Jeupang, Qatar Juara Piala Asia 2019

Awak Qatar leupah seunang hate jih lheuh ditume juara Piala Asia. Awak panyang boh idong nyan dipeutaloe Jeupang 3-1 bak final. Meupo-po sinyak jeut peuanco awak Jeupang nyan. (AFC)

ACEHTREND.COM, Abu Dhabi-Tim Nasional Jeupang, nyang lam pikeran ureung ramee nakeuh seubagoe calon paleng teuga keu juara Piala Asia 2019, rupajih dihamboe uleh Qatar 3-1 di Zayed Sports City, Uni Emirat Arab, nibak Jumat malam (1/2/2019). Meupo-po sinyak keumah peutaloe awak seumah Gunong Fujiyama nyan.

Nibak babak phon Qatar ka meuhase dipasoe dua neuk lam gon Jeupang. Nyang sipak bhan sampoe beureutoh jareng gon Jeupang nakeuh Almoz Ali seureuta Abdulaziz Hatem. Teunte gara-gara dua neuk nyan keuh, teukeujot baten awak Jeupang. Keubit awak nyan hana disangka awak asai nanggroe kaya gah bumo nyan keumah dipeutaloe Jeupang.

Bukon cuma awak Jeupang nyang teukeujot baten. Awak kalon boh bhan man saboh donya pih hana disangka, aneuk buah Hajime Moriyasu keumah dipeulaku uleh awak Arab nyan. Bah pih meunan, Hajime dari awai ka dipeugah Qatar kon cilet-cilet.

Nibak babak keudua, boh bhan antara Jeupang lawan Qatar maken lagak untuk takalon. Mandua tim maken cantek bak diolah boh bhan. Dikilik keuno dikilik keudeh. Disipak keuno, disipak keudeh. Tum le dicuba sipak lam gon lawan. Awak maen boh bhan nyan ditume teusut naphah jih.

Lage neukalon bak tivi atawa lage neubaca nibak media laen yang na chit dituleh teuntang nyoe, Jeupang seumaken gawat dimaen nibak 30 meunet keuneuk habeh wate. Kareuna nyan keuh, bak minet 69 Takumi Minamoto leupah dipeulop lam gon Qatar, alheuh dipeungeut kiper.

Awak Jeupang seunang leupah na kareuna ka leupah dipeulop sineuk. Kana harapan lom awak nyan keu juara Asia. Neukira ju meunyo taloe kalinyo, gadoh marwah awak nyan.

Tapi, lumpo nyan sigra gadoh lam awoe. Nyan tok gara-gara VAR nyang dikalon Maya Yoshida jaroe jih keunong boh bhan. Wasit hana dikalon keujadian nyan.

Kakeuh lah, nibak minet 83 wasit dijok pinalti keu Qatar. Akram Afif nyang dipeuduk keu tukang sipak, leupah dipeulop boh bhan lam gon Jeupang.

Si Afif kon cilet-cilet. Dari phon di maen sampo habeh, jih jai that dibantu tim. Cara jih maen lagak that.

Nibak wate disipak pinalti, jih leupah ditipe kiper Jeupang.

Sampo wasit diyup priep panyang, skor 3-1 hana meu ubah le. Jeupang suwah tikui wate teubit dari lapangan. Awak Qatar dichen-chen seunang lagoina. Lage uroe raya kleng neukira ju lam stadion nyan.




KOMENTAR FACEBOOK