Adak Na Ronaldo, Juventus Beureutoh Jareng 6 Neuk Lam Dua Go Tandeng

Ronaldo teuset lidah jih bak dikilik boh bhan keuneuk jipeulewat gateh awak Parma. BWFBadminton.com)

ACEHTREND.COM, Turin- Nyang kayem peugah Ronaldo that brat hayeu di maen boh bhan lam donya nyoe, bak hie hanjeut that eumbong le wate peugah haba. Dali kaneupeudeuh uleh Tuhan, lam dua go maen kalinyoe, jareng Juventus beukah nam go.

Beukah jareng phon nakeuh wate keunong la’ak nibak Atalanta 3-0 di Piala Italia (Coppa Italy) (30/1/2019) di per peut final. Lheuh nyan keunong goyang lom nibak Parma 3-3 bak minggu 22 Seri A (2/2/2019).

Nibak wate Ronaldo barih dari Real Madrid u Juventus, that jai ureung nyang pike sigam asai Portugal nyan keumah dipeugot droe seubagoe juru seulamat tim. Bah pih meunan jih memang hayeu, tapi kon cit that gawat.

Beureutoh jareng nam neuk lam dua go maen, nyan adalah hai nyang langka ateuh Juventus.Kon barang nyang lazem lage tim ubit-ubit. Dile, lapan thon nyang ka u likot, nibak 6 Januari 2011 na keujadian nyang rap sama. Juventus ditampa-tampa uleh Parma 1-4 di markas dro Juventus. Lheuh nyan dihambo teuma uleh Napoli 0-3 di San Paolo. Nibak wate nyan, dari mandum laga, Juventus keunong labon 10 go. 38 maen teuk meunang.

Nibak wate nyan Juventus bak akhe klasemen meurumpok lapeh tujoh, deungon 58 neuk powen. Juara Seri A nibak masa nyan nakeuh AC Milan.

Kali nyoe, adak beukah jareng jai that, awak Juventus mantong diduk nibak lapeh phon. Awak nyan leubeh sikureung neuk powen dari Napoli. Juventus 60, Napoli 51.

Pukeuh deungon taloe barosa Juventus kana tanda keuneuk rhot dari reunyeun juara? Hana so tuoh lom. Mandum tukang komen hana nyang beuho jok peudapat. Mantong na 16 go maen teuk, artijih na peuluweung peusapat 40 powen lom, sampo Mei ukeunyoe.

Meunyo takalon trend dimaen, napoli pih na can leupah dikoh kaleung Juventus nibak akhe liga.

KOMENTAR FACEBOOK