Dijak Ramah Boh Pha Nek Tuha, AMR Didrop Bentara Nagan Raya

ACEHTREND.COM,Suka Makmue -AMR (59) asai Gampong Krueng Ceuko, Seunagan, Nagan Raya, didrop uleh bentara (polisi-red) Polres Nagan Raya, seubab dilapor dijak uroet paksa tuboh nek tuha umu 70 thon. Sigam bhok nyan leupah diplung wate nek nyan geusurak lake bantu.

Kasat Reskrim AKP Boby Putra Ramadhan Sibayang lam bhah nyan geupeugah, Minggu (3/2/2019) wareh nek tuha nyan dijak meulapor nibak bentara bak tanggai 8 Januari 2019. Keujadian nyan nibak 5 Januari 2019.

Boby dipeugah, nibak wate nyan AMR diteuka u rumoh nek nyan. Meukesud hate dikeuneuk meurumpok ngon W, nyang nakeuh aneuk dari nek tuha nyan. Tapi W hana di rumoh.

Nek tuha nyan geupeugah bahwa aneuk geuh hana di rumoh dan gobnyan pih geuneuk jak u rumoh saket kareuna man saboh badan saket.

Meuban dideungo keluhan nyan, AMR laju dipeutaba jasa jih. Dilake uroet nek tuha nyan. Nek nyan teunte han geutem.

Wate nek nyan geutamong lam kama geuneuk seumayang Asa, AMR diseutot rot likot. Teuka lam kama, dijih sigra dipeuduk nek nyan ateuh kurusi.

Jaroe AMR leupah that tajam. Dari baho sampo boh pha nek nyam ditume uroet. Nek tuha nyan han geubi uroet, geupeugah badan geuh saket that wate keunong uroet.

Tapi si AMR hama ditume deungo. Lage pancuri meurumpok tumpok meuh, jih teutap dilanjot but nyan. Geukalon jamee nyan hana jeulah le, Nek nyan geusurak lake bantu.

Meuban geusurak nyan, si AMR pih teukeujot. Dijih sigra dicok silop puteh tapak diplung u luwa. Meunurot haba, hana ditume tarek naphah. []


KOMENTAR FACEBOOK