Seulaweut Nabi Ngon Dike Molod Leungo Blang Padang

Ureung Banda meu jeumba-jeumba geuteuka nibak Molod Raya di Blang Padang. (Muhajir Juli)

ACEHTREND.COM, Banda Aceh- meuribe droe urueng meutamon di Blang Padang, Banda Aceh, Rabu (6/2/2019). Chiek -putik, tuha -muda, inong-agam, gasin-kaya, malem-biasa, peujabat-agniya, seureuta rakyat jeulata, meutamon keunan kareuna na geupuegot Molod Rayeuk uleh Pomerintah Banda Aceh. 2000 droe aneuk yatim seureuta meutui (piatu) geu undang uleh Pomerintah.

Geupeugah uleh Walikota Banda Aceh Aminullah Usman, idang meulapeh nyang teuka geuba nibak acara nyan nakeuh leubeh 900 boh idang raya. Kuah beulangong, sie leumo reundang, eungkot muloh teucrah, udeung teuphep, timphan balon, asoekaya, meujampu lawok di sinan.

Man 90 boh gampong di Banda Aceh jak intat idang u Blang Padang. Rumoh sikula, kantoe pomerintah, mandum jak meuraya-raya bungkoh nibak uroe nyoe.

Aneuk sikula, mahasiswa, peujabat neugara, awak meukat ie u, awak meukat Aqua, awak meukat ija andok, seureuta awak meukat ie jok, mandum meutamon keunan. Bentara, teuntra, bentara qanun, keupala sikula, ureung capik, ureung buta, ureung saket, ureung teuga, ureung tari, urueng supak, mandum na sinan.

Bek neutanyong aneuk dara, aneuk muda, dalem, cut kak, mawa, cut po, ampon, leube, mantri, doto, na cit sinan.

Ie muka ureung nyan ban mandum nakeuh cukop that bahagia. Mandum rumeh-rumeh lage dara ngon agam ban geupeunikah.

Geupeugah uleh Walikota Banda, dikeu Wali Nanggroe Aceh Paduka Yang Mulia Malik Mahmud Al-Haytar, Pangdam Iskandar Muda seureuta Kapolda dan wakilah lembaga laen, jumeulah ban mandum asoe lapangan nyang geu udang nakeuh 30 ribe droe.

Na cit nyang teuka dari Padang, Jawa dan Turki. Pu nyang geupeugot uleh Banda Aceh, nakeuh, seulaen peurayeuk uroe lahe Nabi Muhammad, lom nibak nyan agenda wisata halal di Indonesia.

Sigohlom Teungku Yusri Puteh pidato masalah molod, di likot nibak nyan nakeuh dibaca seulaweut keu Nabi Muhammad. Meuribe droe urueng baca seulaweut. Sigohlom nyan, dike molod meupah guyak cit. Awak meudike dileungik badan meuleupah na tari.

“Molod kalinyoe, ngon seulaweut mantong leungo Blang Padang,” kheun sidroe abusyik lam keulawan ureung rame.

KOMENTAR FACEBOOK