Rupah Hp Aneuk Sikula, Dua Droe Bandet Dipoh Hanlot Kupiyah

Ilustrasi

ACEHTREND.COM- Jakarta-Dua droe bandet ubit nyang rupah talipun aneuk sikula bak Jalan Pluit Selatan, Penjaringan, Rabu malam (6/2/2019) ruh’ip dihamok ureung rame.

Dari surah nyang dituleh uleh Pos Kota, dua bandet ubit nyan raseuki cit, kareuna hana mate wate dipoh rame-rame le ureung bak jalan. Pakon seulamat? pukeuh kareuna ureung nyang keuroyok na hate nurani? Kon seubab nyan. Dua preman deuk nyan ditume peuseulamat uleh bentara Polsek Penjaringan.

Nibak wate dibaplung ue kanto bentara keucamatan, dua droe bandet nyan nakeuh Aditya (25) seureuta Pandu (27) habeh keumong muka dan leumbam ban saboh badan.

Geupeugah uleh Kanit Reskrim Polsek Penjaringan Kompol Mustakim, Awak agam broek akai nyan dijak rupah hp Apriyani (15) nyang teungoh dijak ngon geureutan meusen (sepeda motor-red) deungon rakan jih.

Teungoh awak nyan dua teuhing-hing ateuh geureutan, dan dikeuneuk puta, teuka si Aditya ngon si Pandu nyang dijak ngon geureutan cit. Lheuh dipeurap geureutan bak aneuk inong putik nyan, sigra dirupah hp nyang dipeuduk nibak dashboard.

“Dari awai awak nyan dua kadikalon aneuk inong nyan dipeuduk hp nibak dasboard. Lheuh nyan dipeurapat geureutan dan diancam pakek sikin,” kheun Mustakim lam basa Toko.

Rupajih, pu nyang dipubut uleh si Aditya dikalon uleh ureung bak ra-uh. Hana geupeutrep, ureung rame sigra geuseutop aneuk kleung nyan bandua. Hana geutanyong sapu le, meunan didong langsong geutakat bak gigoe, geusoh bak muka, geutrom bak tuboh, geuantok bak honda.

Pam-pum, geureupam geureupum, geudeubak-geudeubuk, laju sinan. Hana ditume kinip sahoe, geupoh rap han lot ule lam helem. Salah sidro awak nyan memang ditume plung. tapi ditume drop le bentara.

Dari dua droe bandet ciret nyan, bentara dipeusapat barang bukti nakeuh hp Vivo Y 55, sikrek badik meugo kayee, sikrek celurit meugo atom, Geuteutan merek Honda Vario wareuna puteh.

Geupeugah lom uleh Mustakim, awak nyan dua ka biasa that dipubut but jeuheut nyan di Penjaringan. Kayem that dijak ancam ureung. Cuma kalinyoe meuramah barang. Lheuh dipeulaku gob, keunong drop droe.

KOMENTAR FACEBOOK