Fatihah Hana Ditupu, Alhamdulillah Jeut Jih

ACEHTREND.COM,Banda Aceh- That brat lucu-lucu wate tadeungo calitra ureung keurija bak Kantor Urusan Agama (KUA) di Aceh. Jai calon linto seureuta calon darabaro nyang hanjeut dibeut Quran.

Lage saboh calitra nyang geupeugah uleh ureung KUA di salah saboh kecamatan di Aceh. Kuwaket geusurah bahwa gobnyan kayem that meu urusan ngon catin nyang buta Quran. Kisah nyan geupeugah bak aceHTrend nibak buleun sa 2019. Redaksi katuwo tanggai dan uroe.

Nibak saboh uroe na sidro calon, takheun ju nan calon linto nyan si Lantui, dijih dijak tes nibak KUA. “Aci baca surat Alfatihah,” kheun awak kanto KUA.

Si Lantui teuduk hana dibaca sapu. Ule jih ditikui dikalon u miyup meja. Aleh na deuh limpeun meulho ngon sidom cit di sinan.

“Hai, pakon gata im? Aci takheun ju sigo. Lon nak deungo,” kheun awak kanto nyan.

Si Lantui seumaken ditikui. Lam ruang nyan meu kipah angen, deuh diteubit ruoh jih ubebe aneuk jagong teumon bui kap lam gle.

“Alhamdulillah, jeut teuh digata?” Kheun awak KUA nyan.

“Meunyo nyan jeut lon Teungku,” jaweub calon linto nyan.

Meuban dibaca, lage kameng ek ateuh bate. Nyang leupah lucu lom, meutuka -tuka antara Fatihah ngon Al Baqarah.

“Neukira ju, sangkira kon teungoh ku tes jih, kunak khem beuraya. Bule kabeh ditimoh Fatihah hana meuoh ban lom,” kheun ureueng nyan.

Kisah laen lom, nibak saboh uroe na sidroe teungku Imum geujak ba sidroe calon linto untuk tes. Di si gam nyang taboh nan laju Nuga. Sibuleun sigohlom tes, kalheuh geuyu jak u meulasah jak meuruno beut. Tapi si Nuga nyan keubit kloe prip. Sampoe tanggai tes ka geupeuteunte, jih han tom leumah u meulasah.

Meuban teuka u kanto Kawaket, dikalon le jih jai that calon linto seureuta calon darabaro nyang teungoh tes beut. Sigra dijih dilake idin jak toh ‘ik u likot.

Meunan troh giliran jih, ka hana ditamong lam ruangan. Meuban geujak kalon le teungku imum u likot, ka geukalon jih teungoh jiplung lam blang di likot KUA.

“Puteh tapak jiplung. Rupajih teumakot jih, kareuna hanjeut dibeut Quran,” kheun awak KUA nyan. Sira dicalitra jih dikhem beukah-beukah.

Dari hase keumalon aceHTrend nibak padum pat, memang calon linto seureuta calon darabaro jai nyang han keumah sapu. Dimeunikah hana modal ileume agama meubacut pih. Pu tajak harap muphom fiqh rumoh tangga, meu Fatihah ngon Al Baqarah hana ditupat beda.

Pukeuh nyan na hubungan deungon jai that fasakh di Pengadilan Agama? Nyan gohlom na nyang teujeut bi haba. []

KOMENTAR FACEBOOK