Lheuh Dicu Honda, Diplung u Peusantren, Dibeureukah Teungoh “Dibeut”

ACEHTREND.COM, Bandung-Toatullah atawa kayem ditawok Toat (20) sidroe pancuri geureutan meusen (sepeda motor-red) dibeureukah uleh polisi wate teungoh dijak beut bak saboh pasantren di Cisarua, Sumedang, Jawa Barat, Rabu (6/2/2019)

Si gam nyang ka meu blah go dicu honda atawa geureutan meusen gob, nakeuh ureung kelurahan Sukawana, Serang. Jih jidrop uleh polisi Polsek Kota Serang.

AKP Ramses Panjaitan, Wakapolsek Kota Serang, lam bhaih nyan geupeugah si Toat nakeuh spesialis pancuri honda jamaah mesjid atawa meulasah.

“Jih nyan spesialis tukang cu honda ureung jak seumayang u meuseujid atawa u meulasah,” kheun Ramses, Jumat (8/2/2019).

Dipeugah uleh polisi Batak nyan, katrep si gam bakong nyan ditamong lam target operasi. Cuma hana meupat incit kareuna rupajih dimeusom nibak pasantren. Ceumeucu hana piyoh, jak beut pih hana keundo.

Si Toat leupah dibeureukah uleh polisi, anlheuh keunong drop si Busro Karim (19) wate dicu geureutan meusen Honda Beat A 6087 CR ata si Bunga Sri (25) ureung Kecamatan Kasemen, Serang. Nibak wate nyan si Bunga teungoh diseumayang nibak poh 18.30 di meulasah Al Haq, kompleks Bungur.

“Wate si Busro kamoe drop di area stadion Maulana Yusuf Ciceri, dijih dipeugah nysng cu honda nyan nakeuh si Toat. Si Busro cuma bagian puplung sagai,” kheun Ramses.

Rupajih si Toat kaditeupu di Busro keunong pangklup polisi. Dijih puteh tapak dibalap dari rumoh. Rupajib uleh sidroe syedara jih, si Toat dijak peumeusom bak pasantren.

“Dari syedara jih nyan kamoe teupu jih dimeundap bak pasantren. Kamo jak cok laju. Awaknyan ka 11 go dicu honda gob dileun meulasah atawa dileun meuseujid,” tamah Ramses.

Geureutan nyang dicu nyan dimeukat teuma di Facebook. Yum honda 1,5 juta atawa dua juta.

Berita asai dari Pos Kota, lam basa Indonesia.

KOMENTAR FACEBOOK