Tamong Lam Kama Inong Gob,Sidroe Pak Guru di Pidie Keunong Drop

Ilustrasi

ACEHTREND.COM, Sigli- Sidroe gure sikula (cik gu) di Tijue, Pidie, nyang nan inisial jih M (55) keunong drop uleh TA (38), kareuna ditamong lam kama ML (29). Agam tuha nyang ditume beureukah lam seupot, lheuh ditume plung rot pinto likot.

Mula phon keujadian nyan nakeuh Jumat malam (15/2/2019) nibak poh 21.30 WIB, TA diwoe u rumoh. Meuban teuka u rumoh, TA nyang si uroe-uroe but jih seubagoe buruh bangunan, dikalon sidroe ureung agam tuha geuteubit dari kama inong si TA.

Agam tuha nyan, nyang katrep jeut keu guru (PNS), meupah teuga diplung rot pinto likot. Meuban dikalon na makhluk hana diundang diteubit dari kama awak inong jih, TA, hana dipreh singoh. Sigra dipicrok agam tuha nyan lam seupot.

Pu neukira teuma, umu katuha, pulom ban diteubit lam kama inong gob–hana tatupu puna dipeulaku dua jih– teunte si M nyan hana teuga le diplung. hana jioh dari TKP, jih ditume drop uleh TA, wate teuka bak jurong ubit.

Meuban ditume drop, TA sigra dibahu agam tuha hana the keu untong nyan keudeh bak jambo jaga. Di sinan, agam tuha nyan dijok bak ureung gampong. TA sigra dijak u rumoh M dijak peugah bak inong si M. Inong si M diba cit u jambo jaga. Lheuh nyan si TA dijak bi haba bak ureung tuha gampong teumpat si M tinggai seulama nyoe.

Ule Polisi Pidie AKBP Andy Nugraha, meulalui Ule Polisi Keucamatan Pidie Ipda Junaidi, Aleuhad (17/2/2019) geupeugah si M seureuta si ML ka geudrop dan jino ka geupeu aman nibak kanto polisi.

“Awak nyan dua meulanggeh Pasal 25 Ayat 1 Jo Pasal 33 Aat (1) Qanun Aceh lumboi 6 thon 2014 teuntang hukom jinayah,” kheun Junaidi.

Haba nyoe nakeuh kamoe teurjeumah dari haba Serambi Indonesia.





KOMENTAR FACEBOOK