Ule Keumudo BPMA: Awak Aceh Jai Nyang Carong, Cuma Han Ditem Woe Uroeh Migah Sinoe

Azhari Idris, Kepala BPMA. (Muhajir Juli/aceHTrend)

ACEHTREND.COM, Kutaraja- Ule Keumudo Badan Pengelolaan Migas Aceh (BPMA) Azhari Idris, Rabu (20/2/2019) geupeugah awak Aceh nyang muphom teuntang minyeuk dan gah bumo kon seuminip. Meuleumpah jai. Jino awak nyan dikeurija di lua nanggroe miseu jih di Jeureuman, Inggreh, Australi, dan sibagoejih.

Wate BPMA dibuka peulueweung keurija di sinan, jai that nyang hana ditem daftar. Awak nyan mungken teumakot BPMA hana panyang umu. Na nyang kira BPMA nyan lage Badan Rehabilitasi dan Rekontruksi (BRR) NAD-Nias nyang dipeudong ban lheuh geumpa ngon ie beuna dilamon Aceh.

Bhah nyan geupeutrang uleh Azhari Idris nibak acara : BPMA: Potensi Ekonomi, Investasi, dan Masa Depan Aceh Sektor Hulu Migas (Denyut Nadi Migas di Aceh), nyang dipeugot uleh Aceh Instititute, di warong kupi Paradigma, Batoh, Banda Aceh.

“Na nyang proteh wate dikalon syarat untuk daftar keu calon peugawe BPMA. Dipeugah lage nyan syarat han leupah awak Aceh ditamong. Lon peugah di lon, awak Aceh meuleumpah jai nyang carong-carong di lua. Teuma kareuna BPMA nibak masa nyan meu kanto gohlom na, kakeuh han ditem daftar,” kheun Azhari lam basa Toko.

Azhari geucalitra wate ban-ban BPMA dipeudong di Aceh. Jai that awak Aceh di lua nanggroe dan di dalam nanggroe, han ditem daftar kareuna dipike BPMA nyan han akan panyang umu. Pulom nyang ka keurija bak perusahaan migah nyang raya-raya.

Maka kareuna nyan keuh, Azhari teunte geubeu-ot tabek keu rakan-rakan peugawe BPMA nyang woe dari lua untuk jak peusaboh droe lam BPMA, dengon niet peumaju Aceh.

Ukeu nyoe, nibak buleun lhe 2019, BPMA na dibuka lon peuluweung ke 16 boh kurusi. Lam bhah nyan nyang peugot acara nakeuh Universitas Syiah Kuala. “Bak buleun lhe nyoe na lom dibuka lowongan. Nyang peugot seleksi Unsyiah,” trang Azhari.

KOMENTAR FACEBOOK