Rencana Dinak Poding, Pancuri Manok Keunong Drop Bak Polisi

Manok siam nyang dicu dipasoe lam bagasi geuteutan meusen. (Ist)

ACEHTREND.COM, Jakarta- Dua droe aneuk agam lajang tanggong umu 15 dan 17 thon, dibeureukah uleh polisi Polres Jakarta Timur, Aleuhad (24/2/2019). Awak nyan dibeureukah uleh polisi wate dilewat di jalan Tugu Setu, Cipayung, wate karap suboh.

Lage sisurah Pos Kota, Kepala Tim Satuan Gerak Cepat (SGC) Polres Jakarta Timur Aiptu Ronggeng Maryono, geupeugah dua droe aneuk lajang nyan didrop kareuna meu wet-wet teungoh malam bak jalan. Pulom, meuban dikalon polisi, dua awak nyan langsong teumakot. Sijuk seu-um jih mandua.

Wate diyu dong le polisi, aneuk mit nyan hana ditume pako. Dibalap laju geureutan meusen jih meusalop-salop. Ditubit asap puteh lam keunepot. Meuban dikalon lage nyan, polisi pih hana dipeulheuh angen, sigra dipicrok laju. Aneuk mit nyan seulanjut jih ditamong lam lorong gampong nyang jai rumoh ureung.

“Kamoe pike awai, awak nyan dua nakeuh tukang rampok gob (begal). Rupajih ka kon,” kheun Ronggeng.

Dipeugah uleh Ronggeng, meuban ditume drop, polisi sigra dipareksa awak nyan dua. Pu bhah, rupajih lam bagasi geureutan awak nyan na manok siam agam nyang get that yum jih. Rupajih awak nyan dua pancuri manok.

Dipeugah bak polisi, manok nyan meukeusud awak nyan dikeuneuk publo sijuta. Peng hase nyan akan dipakek untuk jak poding ngon foya-foya. “Phon hana ditem meungaku. Ban keunong paksa, laju dipeugah nyan ata cu,” kheun polisi nyan.

Hase sidek polisi, awak nyan kon ban dimubut nyan. Na padim go ka dicu manok gob. Awak nyan dua spesialis tukang cu binatang nyang di lua rumoh.

Jino mandua jih nyan ka ditheun di Polsek Cipayung.

KOMENTAR FACEBOOK