Diolah Mak Tuan, “Teungku Kameng Bhok” Dibeureukah Polisi

ACEHTREND.COM,Jogjakarta- Narun Khamiyan (30) sidroe teungku pura-pura atawa lazem geukheun teungku kameng bhok, dibeureukah polisi. Useutad kw 70 nyan teuga that diolah ureung inong nyang kayem jak beut bak jih. Di likot nyan, si Khamiyan jiolah cit mak tuan droejih.

Lage si Sugi Nur, nyang peugah droe Gus Nur, tukang fiteunah pomerintah lam majeulih meuupat nyang dibungkoh lam rupa majeulih taklem, meunan keuh but teungku kameng bhok nyan. Jih jai that ureung ikot. Memang ka lazem lam donya nyoe, seumaken jahe ureung ceuramah, maken jai ureung galak. Seubab jeut peugah pu nyang galak.

Walopih si Khamiyan nyan hana tom dijak beut, hana jeut dibaca kitab kuneng, hana meuphom ushul fiqh, dan tan dituri ilme balaghah, tapi jih meupah dithe di Jogja. That jai ureung nyang jak deungo haba bangai jih wate ceuramah.

Disurah uleh Pos Kota, Jumat (1/3/2019) jai that ureung inong nyang meukeunong ngon si gam nyan. Akibat jih, jai nyang ditume ba lam kama untuk dipeugot but nyang hana jeut keubut. Di inong bangai pih nyan dum, kaditeupu meuzina nyan geularang, tapi kareuna nyang lake sidroe teungku, kakeuh dijok laju. Lheuh dipubut, cot ikue diplung.

Nyang gura lom, lheuh dimeukawen ngon didroe dara bak Desember 2018, sigam nyan ditume peungeut mak tuan jih. Meujuta peng ditume ramah kareuna alasan keu promosi jabatan jih bak saboh bank di Jogja. Padahai di sinan jih dikeurija seubago teunaga kontrak. Lheuh dicok peng, badeuron dibalap puteh tapak.

Kheun ureung lingka, untong hana ditume peutika mak tuan jih.

Lam padim uroe nyang ka u likot, si Khamiyan dibeureukah polisi di Tangerang. Sajan jih ditume macam bagoe ATM. Rupajih, meunurot lapuran, jih that jai ka diolah ureung.

Haba nyoe meucok nibak Pos Kota. Meudurah ulang lam basa Aceh. Ilustrasi meucok di sinan cit.

KOMENTAR FACEBOOK