ACEHTREND.COM,Jakarta- Direktur Komunikasi Politik TKN Joko Widodo-Ma’ruf Amin, Usman Kansong, dipeugah Tengku Zulkarnen hana meumada lake meu’ah. Sebab pu nyang jih pubut nakeuh fiteunah dan ata direuka-reuka keudroe.
Lam padim trep nyoe si Zulkarnen nyang nakeuh Wakil Sekjen MUI Pusat, kayem that dipeugah bahwa Pomerintah Indonesia di miyup Jokowi, kamulai peujak haleu zina. Hana mumada nyan, si Zulkarnen dipeugah cit meunyo meunang kalinyoe lom, zina kajeut pubut di Indonesia dan pomerintah akan dibri kondom pre keu ureung meuzina.
“Han meumada lake meu’ah. Jih wajeb peuteupat haba hana beutoi nyan,” kheun Usman Kansong lam basa toko, Rabu (13/3/2019).
Dipeugah le si Usman, pu nyang dipeugah le si Zulkarnen bahwa lam RUU PKS, Pomerintah akan dipeuhaleu zina, nakeuh ka ditamong lam video dan ka dibagi uleh jai that ureung. Ateuh nyan keuh, Zulkarnen wajeb jak tron u lapangan, jak peuteupat bak ureung rame bahwa nyang jih peugah nyan hana beutoi.
“Pak Zul haruih jak u lapangan peugah bak mandum ureung bahwa jih kadipeugah haba ok. Han meumada ngon media sosial di internet,” kheun Usman.
Dipeugah lom uleh anggeta Peureute NasDem nyan, haba fiteunah leubeh mangat disipreuk daripada tajak peubeutoi. Maka si Zul han mumada lake meu’ah. Jih haruih roadshow jak peugah bak mandum ureung jih ka difitnah Jokowi.
Sigohlom jih, Zulkarnen nyan kayem that peugah broh putoh lam ceuramah pulitek, dipeubrok Presiden Jokowi. Jih nakeuh nyang ikot peugah na keureutah suara ka dikirem dari Cina 7 boh kontainer. Mandum keureutah nyan ka dichop keu Jokowi mandum.
Lam dua uroenyoe, jih keunong pasoe lam ploek uleh Ace Hasan Sadzily, ureung carong lam Iseulam dan nakeuh intelektual muda Indonesia. Di keu Hasan si Zul dipeugah na pasai lam RUU PKS na idin peuhaleu zina dan pomerintah wajeb bagi kondom. Wate diyu peuleumah pasai nyan, si Zul hana meupu peugah. Padahai bak jaroe jih na draft RUU nyan. Sambilan teubatok-batok teu eunggik-eunggik si Zul suwah peugah jih golom dibaca draft nyan.Lheuh nyan nibak twitter si Zul dilake meu’ah.
Uleh netizen, lheuh keujadian nyan dipeugah bahwa si Zul nakeuh ulama su’ nyang ditem peulaku macam bagoe, asai tujuan jih troh teuka. Pulom kon kalinyo tok jih diratoh pu nyang diteubit lam taku. Ladom na nyang peugah Tengku Zulkarnen kon ulama.
“Pane nyoe ulama teuma nyan. Meu tasreh basa Arab han leupah. Aci cek riwayat jih jak beut, hana jeulah. Hi teungku kareuna disok seureuban,” kheun netizen.
