Dipeusalah Islam, Politisi Australia Keunong Takat Boh Manok Bak Ule Botak

ACEHTREND.COM, Canberra- Sidroe politisi Neugara Australia, Fraser Anning, Sabtu (16/3/2019) keunong takat bak ule ngon boh manok. Hai nyan kareuna dijak peusalah ureung Iseulam di Selandia Baru, nyang ditimbak uleh sidroe kaplat nyang beunci keu Iseulam

Teungoh mangat dipeugah haba peubrok Iseulam di keu wartawan, ule botak si Anning nyan, ditakat ngon boh manok Australi uleh sidroe aneuk muda nyang dong di bineh politisi nyan.

Aneuk muda nyan memang meupah that ceubeuh. Mungken dijih han me dideungo tutoe “arakate” botak nyan. Sira direukam keudroe, sigra ditakat ule hana ok nyan ngon boh manok. Si Anning teukeujot meuleumpah na. Rupajih, si Fraser nyan bingkeng cit, aneuk muda nyan disoh meupadum go, sigohlom dipubla uleh pulisi.

Aneuk mit nyan sigra dibeureukah oleh pulisi. Si Anning lheuh keujadian nyan didrop cit uleh pulisi Australia kareuna dijak poh aneuk muda nyan.

Kheun ureung Aceh nyang nonton keujadian nyan bak Facebook, dijih meubaro boh manok keunong bak ule, kabeungeh salam le. Kiban cit ureueng nyang ditimbak mate uleh kaplat jeh.

Sigohlom jih si Anning nyan dipeugah keujadian nyan nakeuh kareuna salah ureung Iseulam, jai that nyang ka pinah u Selandia Baru. Pu nyang dipeugah ijih nyan, dikheun uleh PM Australia Scoot Morrison seubago tutoe ureung jahe hana pikiran. Tutoe nyang hana peureule peugah.

Foto ata meucok bak internet.

KOMENTAR FACEBOOK