Publoe Sabe keu Polisi, Preman Medan Keunong Timbak

@kompas

ACEHTREND.COM,Medan- Dua droe ureung agam nakeuh AYY (47) dan LGH (57) ditimbak uleh polisi nibak gateeh, kareuna dicuba plung wate keunong drop meukat sabe. Nibak jaroe dua bandet nyan, polisi disita dua kilo sabe.

Dipeugah uleh Kasubdit II Direktorat Narkoba Polda Sumatera Utara, AKBP Hotman Paulus Sinaga, Aleuhad (14/4/2019) dua bandet nyan ditimbak kareuna dilawan polisi.

Dua droe si beureukah gulam nyan, “dibeureukah” uleh polisi nibak uroe Hameh (11/4/2019) di jalan Gatot Subroto, Medan. Dari info ureung di sinan, di jalan nyan memang kayem na awak meukat sabe.

Ateuh info nyan, polisi dijak meunyamar. Dipeurupa droe keu awak bloe sabe. Lheuh pakat yum dan jumeulah kilogram, polisi dipreh di TKP. Dua droe bandet nyan jak intat barang. Meunan sabe dipeujaroe bak polisi, sigra mandua awak nyan dimat bak jaroe.

“Nyan ho kaneuk plung lom, ka kutume keuh. Habeh keuh uroenyoe,” kheun polisi lam basa toko.

Meulumpah teukeujot dua droe bandet nyan. Keubit hana disangka, keubit hana diduga, teuka hate polisi dijak meunyamar keu awak bloe sabe. Adak meuditupu dari awai pasti han dijak intat barang hareum nyan.

Teupeh that hate dua bandet nyan. Han disangka polisi troh keunan dikeurija. Kareuna nyankeuh, wate dikeuneuk ba u kanto, sigra awak nyan dimeulawan dan ditume plung siat. Hana jioh dibileung langkah, mandua awak nyan keunong timbak bak gateh.

Memang seip hayeu cara teumimbak polisi wate didrop bandet. That cabat jaroe jih. Sep brat timang bak gateh keunong. Lheuh keunong timbak, awak sabe nyan dimeungaku diteurimong ungkoh 40 juta Rupiah, meunyo sabe nyan lagot. []

Ilustrasi dikutip dari internet.

KOMENTAR FACEBOOK