Dicu Buso Bak Gudang Bupati Abdya, Polisi Beureukah Sidroe Aneuk Muda Susoh

Becak meusen ngom buso nyang dicu uleh si RHS. Foto: Ist.

ACEHTREND.COM, Blangpidie- Sidroe aneuk muda nyang nan geunanto siat RHS (29) asai Gampong Padang Baru, Kecamatan Susoh, dibeureukah polisi. Si gam nyan didrop uleh seubab dicu buso nibak gudang Bupati Abdya.

Dipeugah uleh polisi, RHS dipeuaman uleh polisi kareuna dijak cu buso bak nibak gudang pupok urueng lumboi sa di sideh. Gudang nyan na di Gampong Iku Lhung, Kecamatan Jeumpa, Abdya.

“RHS dicu buso bak gudang Pak Bupati Akmal Ibrahim. Ka tapeu aman u Mapolres Abdya,” geupeugah uleh Waki Ule Polisi Abdya, Kompol Ahzan, SIK. Peuneugah gobnyan geutuleh lam seunurat yang teuka nibak wartawan aceHTrend, Seulasa (28/5/2019).

Ahzan geupeugah, si RHS diceumeucu nibak uroe Seulanyan, 27 Mei 2019, nibak poh 18:35 WIB.

But ceumeucu nyan buco, kareuna sigohlom dipeubut but jahe nyan, na sidroe tukang jaga gudang nyan meurumpok bak ra-uh deungon si RHS. Siploh minet lheuh nyan si tukang jaga gudang nyan digisa lom nibak teumpat nyan. Dikalon teuk si RHS teugoh dipeusapat buso dipeuduk lam becak. Hana dipreh singoh, sigra ditop pinto gudang dan dikurong pancuri nyan lam gudang.

Lheuh dikurong RHS, si gam nyan dijak peugah bak urueng lingka bahwa na pancuri lam gudang. Sigra urueng meukumpoi keunan geujak drop pancuri bulut nyan.

Lheuh geudrop, si RHS sigra geujak intat u kano polisi Kecamatan Blangpidie. Di sideh jih sigra dipareksa dan kemudian diba u Mapolres Abdya.

Barang bukti nakeuh lhe krek buso baja, tujoh krek buso laen, dan saboh becak meusen. Yum rugoe po gudang lheuh dikira-kira nakeuh sijuta Rupia.

KOMENTAR FACEBOOK