“Rudhok” Aneuk Cut Lam Blang, Apa Tuha Dibeureukah Polisi

ACEHTREND.COM,Bireuen- That meupaloe but sidro ureung agam tuha nyang ka meube tanoh di Bireuen. Walau umu ka 57 thon, Has (nan inisial) ureung di salah saboh gampong Kutablang, geutume rudhok lam “mon” aneuk mit cut. Na dua go geutume peuleumah hayeu bak aneuk malang nyan. Lheuh nyan puteh tapak geuplung.

Meunankeuh awai calitra keujadian dugaan Has nyang ditudoh geurudhok “mon” aneuk mit saboh gampong ngon apa tuha nyan. Ureung agam be balsem nyan, Seulasa (18/6/2019) nibak poh 13.30 WIB diintat uleh wareeh jih u kanto polisi di Cot Buket, Peusangan, Bireuen.

Kapolres Bireuen AKBP Gugun Hardi Gunawan SIK MSi melalui babah Kasat Reskrim Iptu Eko Rendi Oktama SH, geupeugah, but ayeb nyan dipubut uleh Has ateuh tuboh aneuk inong umu 11 thon, nibak wate teungoh dimaen lam blang.

Teuka bak teungoh blang, Has dipakat aneuk cut nyan maen “balap guda”. Has jeut keu joki, aneuk nyan jeut keu guda. Keujadian nyan nibak buleun limong nyang ka leupah, thon 2019. Rupajih, nyan kon le sigoe. Na dua go ditume giduk aneuk nyan oleh apa tuha nyan.

Meuban meugah Has ka “dipajoh” aneuk mit, sigra apa nyan dibuka silop diplung meuasap. Puteh tapak dipeutak hana meuho rauh.

“Dua go minggu kamoe seutot, hana meuho diplung,”kheun Rendi Oktama lam basa Indonesia.

Polisi pih hana dipiyoh. Diimbau bak wareeh Has, supaya agam nyan teubit dari teumpat diindap dan dijok droe bak polisi. Rupajih imbauan nyan manjur. Sigra lheuh nyan Has diintat uleh wareeh jih bak kanto polisi Pospol Kutablang, Bireuen. Nibak polisi Has ka dimeungaku ka dipeulaku aneuk mit cut.

Jino ureung tuha hana tuho nyan ka dipeuaman nibak Polres Bireuen.

KOMENTAR FACEBOOK