Bloe Honda Cu, Awak Pante Bidari Dibeureukah Polisi

Si ARI nibak Polsek Tanoh Jambo Aye, Aceh Utara. Nibak uroe raya nyoe sang suwah dom di keurangkeng polisi. Foto: aceHTrend/Mulyadi.

ACEHTREND.COM, Lhoksukon- That paloe nasib si ARI bin ZU (20) aneuk lajang asai Gampong Grong-Grong, Pante Bidari, Aceh Timu, dibereukah polisi, Aleuhad (4/8/2019) kareuna nibak jaroe jih ditumee Honda Scoopy BL 5958 ZAP. Honda nyan nakeuh ata gob nyang ka gadoh padim wate nyangka u likot.

That peuja neukiraju, lam padim uroe teuk ka Uroe Raya Haji, tapi si ARI ka suwah dom nibak kantoe polisi dan deungo teukeubi lam keurangkeng buso.

Dipeugah oleh Kapolres Aceh Utara AKBP Ian Rizkian Milyardin, nyang dipeusampoe uleh Kasat Reskrim Iptu Rezki Kholiddiansyah, nibak uroe Aleuhad nyan, po Honda Scoopy nyang nan jih Safrizal, teungoh meuwet-wet lam pasai Lhoksukon.

Teuka dikeu saboh keude stiker, jih dikalon Honda Scoopy jih nyang ka gadoh, na bak leun keude, teungoh dipasang stiker. Nyang po Honda Scoopy nyan that ditanda atra droejih.

Meuban dikalon Honda Scoopy biru nyan, Safrizal sigra dipeurap. Meuban dikalon jok honda teuhah, sigra dicok STNK lam keih drojih dan dipeusama lumboi rangka. meuban hana beda, sigra jih dijak meulapor bak Polsek Tanoh Jambo Aye.

Hana dipeutrep le, polisi sigra dibeuot saoh, dijak bak keude stiker nyan. Bak si ARI sigra dilake STNK. Meuban dikalon polisi, si ARI nyan diteubit ruoh lam kudok jih.

“Hana surat Honda Scoopy nyoe, Pak,” kheun si ARI. Kakeuhlah, kareuna hana surat, si ARI dan Honda Scoopy nyan diangkot u Polsek Jambo Aye.

Dikeu polisi si ARI dipeugah bahwa honda nyan dibloe le jih dibak si AR (22) yang meuturi ngon jih bak keude internet di Lhok Nibong, Aceh Timu. Honda nyan dibloe deungon yum Rp5 juta. Teunte kon yum honda nyan, miseu dibloe sidim nan hareuga.

Ateuh but nyan, walau pih si AR ka lam daftar DPO, tapi si ARI diangkot cit u Mapolres Aceh Utara. Dipeugah le polisi untuk hai pareksa leubeh dalam.

Cuma dipeugah uleh sidroe ureung, minimal nibak uroe raya nyoe, si ARI ka suwah kuwin lam tutopan polisi.

Translate lam basa Aceh: Muhajir Juli

KOMENTAR FACEBOOK