Ibu Kota Indonesia Jadeh Pinah u Borneo Timu

Infografis dan ilustrasi bersumber dari " detikfinance.

ACEHTREND.COM, Jakarta- Presiden Republik Indonesia Ir. Joko Widodo, Seulanyan (26/8/2019) geupeutrang bahwa ibu kota Indonesia jadeh pinah u Borneo Timu (Kalimantan Timu-red). Hai nyan dipeunyata uleh Jokowi di Istana Neugara di Jakarta.

Hase pareksa dan seuneulhoh uleh awak carong-carong meubagoe bideung, dua kabupaten nyang akan dipeudong ibu kota nakeuh Kutai Kartanegara seureuta Penajam Paser Utama. Dua daerah nyan akan sigra dibangun keu geulanto Jakarta nyang meunurot awak carong-carong, hana layak le keu pusat Pomerintah RI.

Wate geupeugah bhah nyan nibak wartawan, Presiden Jokowi dipeungon uleh Waki Presiden Jusuf Kalla, Meuntroe Lam Nanggroe Tjahjo Kumulo, Meuntroe PUPR Basuki Hadimuljono, Ule Bappenas Bambang Brodjonegoro, Meuntroe ATR/Ule BPN Sofyan Djalil, Meuntroe teumpat Meuhudep dan Uteun Siti Nurbaya, Gubernur DKI Jakarta Anies Baswedan, seureuta Gubernur Kalimantan Timur Isran Noor.

Reuncana pinah ibu kota u Kalimantan, bukonkeuh ata nyang lahe di masa Jokowi. Dile, wate Ir Soekarno mantong mat keumudo RI, gobnyan na reuncana pinah ibu kota u Palangkara di Borneo Teungoh. Ata nyang geupeusampoe ninak 17 Juli 1957 wate geujak kunjong banda nyan deungon
Duta Besar Amerika Serikat Hugh Cumming Jr, Dubes Uni Soviet D. A. Zhukov, serta Sri Sunan Pakubuwono XVII.

Nibak wate nyan Soekarno juga geupula kaye pancang di sinan. Palangkara, geuboh areuti nakeuh seubagoe teumpat nyang suci, mulia seureuta agong. “Teumpat nyoe akan lon peugot keu ibu kota Indonesia,” kheun Soekarno nibak wate nyan. Tapi, ata nyan hana maujud. Sampoe Soekarno dicungke dari jabatan lheuh keujadian Gestapu, rencana nyan hana so peujak le.

Reuncana Pinah u Bogor

Ule Pomerintah RI nyan kedua, Soeharto–incit Tuntra KNIL yang gabong keu Tuntra Keumanan Rakyat (TKR) yang di Aceh kayem ditawok Lek To, nacit reuncana pinah ibu kota Indonesia.

Tapi, nibak wate Lek To jeu keu Presiden RI, ijih hana jioh-jioh dinak pinah ibu kota. Rencana gobnyan cuma pinah u Bogor Timu. Nyang peunteng teutap di Jawa. Hanjeut u luwa Jawa. Alasan nakeuh suai infrastruktur dan jumeulah peng.

Ditulak Uleh Awak Talo

Program pinah ibu kota Indonesia u luwa Jawa, dilawan habeh uleh awak taloe lam dua go Pemilu Presiden. Awak nyan dipeugah hana peureule jak pinah ibu kota u luwa Jawa, nyang na jai habeh cit peng.

Awak taloe nyang lam pulitek kayem ditawok seubagoe oposisi, dibie alasan macam-macam. Lam mandum acara dipeugah ata nyan. teurmasuk lam forum khusus awak nyan untuk ulok-ulok pomerintah nyang disiar uleh salah saboeh stasion tiphi di Jakarta. Sampoe aneuk mit ban tamat sikula diba lam acara nyan untuk jak kheun keu pomerintah hana beutoi.

Tapi, Jokowi memang ureung klo tungang. Meunyo ka direncana hanjeut hana pubut. Agam pijut asai Solo, Jawa Teungoh, teutap han diubah reuncana. Menurut Jokowi, Indonesia harus dipeumaju ban mandum lungkik. Hanjeut Jawa mantong nyang pajoh nikmat hase peububeuh neugara uleh ureung awai.

KOMENTAR FACEBOOK