Aceh Lam Leumung Peunyaket Bukriek

1,9 Juta Aneuk Aceh keunong Peunyaket Bukriek

Bu puteh ungkot masen. Makanan si uroe-ureung ureung gasien di Aceh. Nyan foto ilustrasi, kareuna hana mungken ta foto pingan bu gob. Foto: internet.

ACEHTREND.COM, Banda Aceh- Binoe Plt Gubernur Aceh Dyah Erti Idawati, geupakat kawom mak man sigom Aceh untuk peugot prang lawan peunyaket bukriek (stunting). Bhah nyan dipeugah uleh Dyah nibak acara Pelatihan Peningkatan Kapasitas Kader Masyarakat, yang dipeugot nibak Hotel Permata Hati, Banda Aceh, Seulasa (17/9/2019).

Dyah nyang teuka keunan seubagoe Waki Keutuha TP PKK Propinsi Aceh, di keu urueng rame geupakat ban mandum kawom mak (ureung inong nyang kalheuh kawen) meuglong gaki lawan bukriek, deungon harapan nibak ukeu nyoe, aneuk-aneuk Aceh nyang lahe u donya jeut keu aneuk nyang carong.

Lam bhah nyan, Dyah dipeugah lom bahwa, seucara umum bukriek nyan teuka kareuna aneuk mit hansep gizi nyang gawat. Akibat jih nakeuh aneuk mit nyan han keumah rayeuk seucara leubeh get. Miseujih, tuboh aneuk mit tu’et, dan geuhon badan jih hana samporeuna lage aneuk mit nyang sep gisi, seureuta pijut rut.

Kon cuma nyan, Dipeugah uleh Dyah, aneuk mit nyang keunong peunyaket bukriek, utak jih hana berkembang seucara normal. Sehingga teupeungaroh deungon daya pike nyang leumoh.

“Beuteugoh-teugoh that. Nyang tatakot nakeuh utak aneuk mit hana meukeumbang. Seulaen nibak nyan, peunyaket bukriek jeut cit dihambat tuboh aneuk mit sehingga han ditem rayeuk seucara normal. Meunyo aneuk mit jinoe keuunong bukriek, kiban taneuk harap awak nyan singoh dijak pimpin bangsa nyoe? Padahai Pak Nova that geuharap bila aneuk Aceh jeut keu geuneurasi nyang hayeu keu peulanjut Aceh Hebat,” kheun Dyah.

Lam bhah nyan, Dyah dipeusampoe keu kawom mak nyang teuka bak acara nyan, seureuta keu mandum ureung inong ka meulakoe ban sigom Aceh, untuk jeut peuseip asoe prut aneuk mit deungon makanan nyang sep vitamin, mineral dan sigala macam laen-laen. Intijih aneuk Aceh harus troe dan sep vitamin.

Ata nyan dimulai dari masa lam kandongan, sampoe aneuk manyak mirah troh umu dua thon. Kareuna 70% perkembangan utak aneuk meut dimulai dari umu sidipnan. Seureuta akan meu meutaloe-taloe sampoe umu limong thon untuk sampoe bak angka 90 %.

Program Asoe Pingan Bu

Dyah dipeugah cit bila jino kaharus mulai lawan bukriek dari gampong meulalui keurija Posyandu gampong nyang na di tip gampong di Aceh. “Muenyo kon dari gampong tamulai, maka peukara nyoe han akai seuleuso,” kheun Dyah lam bahasa Indonesia.

Seulaen nibak nyan, Dyah juga dipeutrang bak ureung rame bila di Nasional, Kementerian Kesehatan teungoh dipeulaku program isi piringku (Asoe pingan lon). Lam bhah nyan meukeusud program nakeuh lam saboh pingan bu di sinan na protein, karbohidrat, vitamin, dan mineral nyang seuimbang.

“Pajoh bu kon seukeudar keutroe. Tapi haroih na nutrisi nyang sep untuk tuboh. Nyang paleng peuteng na protein dan nyan harus dimulai dari mume (hamil). Kareuna nyan nutrisi nyang paleng peunteng keu utak aneuk lam prut ureung inong mume,” kheun Dyah.

Aneuk Mit Gasien Jai That di Aceh

Seusai data Susenas thon 2016, jumeulah aneuk mit gasien di Aceh nakeuh 20,51 %, jioh that bila tapeubandeng deungon rata-rata nasional nyang cuma 13,31 %.

Jumeulah nyang that jai nyan, bila tapeukap deungon jumeulah aneuk mit dimiyup umu dua thon nyang keunong bukriek nakeuh 37,9 %. Seudangkan prevalensi rata-rata nasional 30,8 %. Bila tajumeulah seucara angka, 1,9 juta aneuk mit di Aceh keunong peunyaket bukriek.

Ureung Aceh Hana But dan Gasin Seureuta Bangai

Bila tapeukayet-kayet antara jumeulah aneuk mit bukriek deungon kondisi Aceh uroenyoe, teunte that brat meukayet. Jumeulah ureung gasien di Aceh nakeuh diduk nibak rangking limong daerah paleng gasien se Indonesia. Indeks Pembangunan Manusia diduk nibak angka 70,6 persen, dimiyup rata-rata nasional deungon nilai 70,81 persen.

Seusuai data Badan Pusat Statistik (BPS), jumeulah ureung hana keurija di Aceh nakeuh 154 ribe droe. Nyan data thon 2018. Meutamah 4 ribe dari thon 2017.

Dari padum-padum droe ureung di miyup nyang aceHtrend pakat peugah hana lam padim masa nyoe, dipeugah bahwa untuk peugadoh aneuk mit bukriek, hana keumah deungon sosialiasi sagai. Karena nyan na hubungan dengan asoe bhep (kantong) yah ngon ma jih. Peukara gisi konlah seukeudar pajoh gule on rumpun bak seuminar.

“Meunyoe takalon pu nyang geupeugah uleh pomerintah Aceh, cit that brat beutoi. Teuma di likot nibak nyan, makanan nyang na gisi nyan hana dibie pre bak keude gob. Ungkot dipubloe, gule dipubloe, breuh dipubloe. Teuma meunyo hana peng lam bhep, ngon pu taneuk bloe. Ayah awak nyoe lam sigoe minggu hana teunte geutume keurija meu lhe uroe. Aneuk di rumoh na nam droe. Toh nyang taneuk bloe makanan, toh keu peng jajan sikula, toh keu kamoe inong untuk poding?,” kheun Jamilah (40) awak Aceh Utara, wate meurumpok ngon aceHTrend padim uroe nyang ka u likot. []

KOMENTAR FACEBOOK