Prabowo Ka u Dalam, Apa Karia: Nyan Cok

Zakaria Saman. (Foto: Taufik Ar Rifai/aceHTrend)

ACEHTREND.COM, Jakarta- Mentro Pertahanan GAM, Teungku Zakaria Saman, Geupeusampoe nibak ureung Aceh, bahwa Pilpres Indonesia 2019 beujeut keu peungalaman. Nyang kaleupah peugah keu keu syadara seubago kafe, pengikot PKI dan seugala macam laen, kajeut lake meu’ah. Uroenyoe kadeuh dali, bahwa nyang leupah geupujo uleh ureung Aceh, sadum lumboi cit deungon nyang geubenci.

Hai nyoe geupeugah uleh Teungku Zakaria Saman, Seulasa (22/10/2019). Lam bhah nyoe, kheun Apa Karia, ureung Aceh ukeu nyoe bekle lage keuleude ba kitab. Bak sang-sang kanyoe that bak peugah haba bhah pulitek. Bahu-bahu agama lom lam peukara pilpres. Sang-sang meunyo meunang si A Indonesia jeut keu kafe, meunyo meunang si B, Indonesia jeut keu nanggroe Iseulam nyang taat.

“Nyan kalon, digeutanyoe ka tameuantok-antok, ka takheun pu nyang teuset lam takue keu syedara teuh. Baroe, Seulanyan, 21 Oktober 2019, Prabowo ka dijak u istana. kajeut keu calon mentroe. Nyan cok!,” kheun Apa Karia.

Geupeugah uleh Apa, ukeunyoe, cara seumike ureung Aceh beumeutamah carong bacut teuk. bekle geutem dibahu-bahu uleh urueng yang peurupa-rupa droe malem, kemudian dijak plah urueng Aceh lam bhah politek. Ureung Aceh harus na ilme tileik nyang jroeh, nak sehat cara seumike.

“Lam pulitek nyoe, top nyang seunang, ikot nyang meunang. Bek hana meupu sapue kajak ikot tarian gob meunari. Nyan uroenyo, pu bhah ka? Mantong na peukara agama? Rupajih ka kon lagoe? Rupajih cuma peukara jabatan sagai, kon peukara agama,” kheun Apa Karia.

Sigohlom geutöp talipun, Apa geupeugah, ukeu nyoe beujeut keu peulajaran, bahwa bida lam bhah politek nyan biasa. Tapi bek sampoe jak ba-ba agama u dalam nyan, kareuna awak pulitek nyan kon nyan dijak pike. Lam pikiran jih nakeuh soai kurusi.

“Bek leumo grop paya guda cot ikue. Gob mita kuasa, geutanyoe nyang karu,” kheun Apa. []

KOMENTAR FACEBOOK