Cukai Rukok Diék Lom, Awak Piep Rukok: Pomerintah Lage Hana But Laen

Cukai rokok. (detik)

ACEHTREND.COM, Jakarta- Meubaroe dua uroe diduk lom keu Mentroe Peng Republik Indonesia, Sri Mulyani laju dipeuék cukai rukok. Kebijakan nyang meusupet ikue awai piep rukok nyan geutuleh lam Peuraturan Meuntroe Peng RI lumboi 152 teuntang Yum Cukai Hase Baköng (Tarif Cukai Hasil Tembakau).

Lam aturannya, nyang dikutep aceHTrend, Hameh (24/10/2019) Sri Mulyani dipeugah, nyan ka seusuai deungon parameter nyang trang, ditamong lam akai dan jeut dipeutanggong jaweub seureuta dikalon dampak dan keuadelan ureung ramee dan keu kepentingan neugara.

Lam aturan nyan yang diteken nibak tanggai 18 Oktober 2019, dipeuék cukai rukok nyan hana saban. Bida antara Sigaret Kretek Mesin 9SKM) golongan I peuneugot lam nanggroe, deungon Sigaret Putih Mesin (SPM).

Dari padum-padum droe ureung nyang ditanyong peundapat uleh aceHTrend, ureung nyan hana peukara cukai rukok dipeuék uleh pomerintah. Asai nyum rukok teutap saban lage awai dan na barang.

“Nyang peunteng bek putöh barang. Nyum bek meutuka,” kheun Zainal Abidin yang kayem ditawok deungon nan Jack.

Teuma laen lom haba dari Ibrahim (45) nyang di gampong jih ditawok Him. Dipeugah le si Him, but pomerintah tiep ure peugot susah ureung piep rukok. Mulai dipeugot kawasan hanjeut meurukok, sampoe dipeuék yum rukok.

“That gura bit. Meunyo keubit-bit rukok nyan hana get, hareum dan seubagoe jih, keupu cit mantong dipeugot dan dijak meukat?,” kheun si Him sira ditarek rukok samsu balot sibak.

“Pomerintah nyoe lage hana but laen,” dikheun lom sira ditarek sigoe teuk. []

KOMENTAR FACEBOOK