ACEHTREND.COM, Lhokseumawe- That gura bit, NZ,Keutuha PK Banda Baro KNPI Aceh Utara, dibeureukah uleh polisi, kareuna diduga kadijak peulaku peut droe ureung inong. Hase sidek awak baje coklat, si NZ hana ditume “teugon gamet” ateuh peut droe awak inong nyan. Cuma ditume raba-raba sagai.
Nyang meupah gura lom, dipeugah uleh Kapolres Lhokseumawe AKBP Ari Lasta Irawan, rot Kanit PPA Lilisma Suryani, Sigohlom ditume raba -raba CN (17) sigohlom jih, si NZ na cit dijak raba-raba mak si CN nyang nan geuh FY (39).
Awai jih, FY dipeu-im but bakhe si NZ. Teuma kareuna si gam nyan dijak peulaku CM, maka deungon hate nyang brat, dipeugot laporan nibak polisi. Rupajih, bukon awak nyan dua nyang kalheuh dijak “gusuk” uleh si NZ, na dua droe teuk nakeuh FTA (17 seureta NA (17). Awaknyan man peut droe na hubongan wareh.
“Mandum awak nyan nakeuh jiran si NZ di Banda Baro. To-to rumoh ngon si NZ,” kheun Lilis, Hameh (5/12/2019)
Sigohlom dilapor u bak polisi, keluarga FY kalheuh dibi the nibak ureung tuha gampong. Tapi sampoe si NZ didrop uleh polisi, hana jeulah lom kiban hase seuneulheuh.
Nibak polisi, CN dipeugah si NZ ka dua go dipeulaku jih. Keujadian nyan di rumoh nek si CN. Keujadian phon wate si CN teungoh ditagun ie. Si NZ dijak u dapu dan diraba punggong si CN. Kali keudua, si NZ diseutot CN sampoe lam kama. Di sinan si gam nyan direugum aneuk dara nyan sambe dicom dan ditindeh badan. Kareuna di CN dimeulawan, si NZ dibeudoh dijak woe.
Kareuna han leupah le dikabom lam hate, CN dipeugah mandum bak mak jih. Pu tanyong teuma, meuban dideungo haba nyan, meub’hak-b’hak diek darah FY. Rupajih kon jih mantong dijak peukaru. Aneuk-aneuk jih dipeulaku.
Hana dipreh singoh, FY sigra dijak u kanto polisi dijak ba laporan. Lheuh diteurimong laporan nyan, polisi sigra dijak u lapangan. Han trep nibak nyan si NZ “dibeureukah” dan dibahu u kanto polisi. “Si NZ didrop nibak tanggai 23 November 2019.”
Jino siat NZ ditheun lam glap dan dibidek deungon Qanun Aceh Lumboi 6 Thon 2014 Teuntang Hukom Jinayah. Deugon ancaman 90 go cambuk, atawa suwah bayeu dam 900 gram meuh murni atawa diglap 90 buleun lam tutopan.
