Rakyat Ubit Keucewa keu Pemimpin di Aceh

Ilustrasi. Source: Merdeka.Com

ACEHTREND.COM,Banda Aceh- Na lhe boh peukara di miyup nyang mantong jeut keu peukara rakyat, nyang sampoe akhe thon 2019 gohlom seuleuso. Nyang keuphon nakeuh peukara gah lhe kilo nyang jareung na seureuta yum jih meuhai. Hai keudua, pupok subsidi nyang hansep keu mandum ureung meugo. Hai keulhe nakeuh hana ruweung untuk mita keurija.

“Na pemimpin lage tan. Tapeugah tan, tapi na,” kheun Abdullah (59) ureung Aceh Timu, Hameh (26/12/2019). Ureung agam sidroe nyan lage hi ka putoh asa bak geupeugah haba.

“Na lon baca koran. Geupeugah geuneuk bloe kapai ngon moto mewah keu peujabat. Bhah nyan hana lon jampu. Kareuna hana muphom di ulon peukateun awak nyan. Tapi di miyup nyoe, bhah kamoe nyang ubit-ubit hana meujan seuleuso,” kheun Abdullah, sira geupalet bakong asoe.

Abdullah keucewa keu panghule di Aceh. Seubagoe ureung nyang ka tuha dan tinggai sidroe, peukara gah lhe kilo sep jra bak geujak mita. “Nyang keuphon yum galak-galak awak meukat. Keudua, miseu na peng hase tapublo pineung ruk, ka hana gah bak keude,” kheun Abdullah.

Abdullah lage bak hi ka brat that menderita. Lam babah gobnyan hana le diteubit doa nyang got keu panghule nanggroe di Aceh. “Mandum awak nyan tan jeulah. Keu rakyat sapu tan dipike.”

Peukara gah lhe kilo, bukonkeuh keluhan Abdullah sidroe. Tapi rap mandum ureung Aceh subra bhah nyan. Jamilah (45) sidroe bino di Aceh Jeumpa, geupeugah bak aceHTrend, hana wate nyang hana gabuk asai habeh gah. “Kayem that di gah meutuwah nyan habeh wate beungoh uroe. Lage kadiseutel keudroe jih. Nyang jeut keupeukara, yum hana meuteunte lheuh nyan hana barang. Kadang troh limong kilomete tajak rawon lam beungoh buta, tan barang,” kheun Jamilah.

Jamilah nakeuh sidroe dari padum droe warga Aceh nyang tem peugah haba peukara gah lhe kilo nyang hansep barang.

“Wate taingat keu gah lhe kilo, sang-sang geutanyoe hudep lam rimba. Hana tatupat peugah. Tip thon meuno, tapi hana meujan seuleuso. Sang awak dinah seureuta pemimpin, kabeh mate mandum. Nyan han leupah diuroh,” kheun Ratna (35) ureung inong dua boh aneuk asai Aceh Rayeuk.

Laen lom haba nyang dipeugah uleh Pikar (40). Ureung meugo asai Aceh Utara nyan, dipeugah saban thon pupok subsidi hansep barang. Peng Aceh yang meukuyan-kuyan, lage hanjeut dibi keu rakyat.

“Han tatuoh peugah le hai Pak Wartawan. Kamoe meublang, alah na irigasi awai ata geupeugot le Pak Ibrahim Hasan. Meuhan cit tan sapu na. Pupok subsidi, adak tameuklok, hana barang. Sabe dipeugah hana sep barang. Nyang meupalo lom, solusi laen pih hana dibie.

Lam padim uroe nyang ka u likot, Juanda Djamal, Keutuha Fraksi Peureute Aceh di DPRK Aceh Besar nyan cit yang dilapor uleh ureung meugo di Suka Makmur. Pupok subsidi hana di keude. Seureuta padim boh pinto ie irigasi punoh broh.

Lam bhah lapangan keurija, rame aneuk muda lulusan sarjana, nyang tamat SMA, SMP dan SD, rame-rame beuot sa-oh u Malaya. Di nanggroe hana ditupu peubut.

“Wate tasimak, seupot lheuh. Hana deuh sapu. Hana tatupu pubut,” kheun Fadli, lam padip buleun u likot. Rakan muda nyang ban meunikah nyan teungoh diuroh dokumen keuneuk jak u Malaya.

“Wate tapeubandeng peng, memang hana jioh beda. Tapi sideh [Malaya] na but. Asai beungoh tatuho jak. Wate troh buleuen na gaji. Sep tapajoh dan na sisa lon kirem u gampong,” kheun Fadli.

Dipeugah uleh Fadli, rame rakan jih di Malaya. Macam but dipubut di sideh. Mulai tukang koh ok, sampoe keurija bak kilang [pabrek].

“Bak geutanyoe nyang hanjeut keundo peugah MoU nyoe MoU jeh, tapi hana nyang jeulah investor. Wate tabileung awak Aceh di Malaya, sang sep keu tapeudong saboh kabupaten teuk,” kheun jih sira ditarek rukok puteh.

Ban mandum ureung nyang ditem peugah haba nyan, diharap keu pemimpin di Aceh untuk seumike keu peukara rakyat di miyup. Peng otsus nyang meukuyan-kuyan dibie keu Aceh uleh Pomerintah Pusat, beujeut dirasa uleh rakyat.

“Meunyo moto dinas, kapai dan laen-laen jeut dibloe ngon peng nyan. Pakon hanjeut teuma peng arwah ureung Aceh nyan dipakek untuk tamah pupok subsidi, tamah kuota gah lhe kilo, atawa buka teumpat keurija keu ureung gampong?” Kheun Fikar.