Awak Aceh Diyu Drun di Rumoh, Cina Luwa Ditamong u Nagan Raya

Tujoh droe awak Cina asai luwa, ditamong u Nagan Raya. Pomerintah Aceh hana that dipakoe awak luwa teubit tamong Aceh, padahai awak gampong han dibi jak saho. [Asai gamba: Waspada]

ACEHTREND.COM,Nagan Raya- Useuha Pomerintah Aceh diyu drun di rumoh (stay at home)awak gampong man saboh Aceh, seureuta ditham han dibie jak sahoe, rupajih hana dipeulaku keu awak luwa. Buktijih, tujoh droe awak Cina leupah ditamong u Nagan Raya, Rabu (1/4/2020).

Cuma kalinyo, tujoh droe WNA asai Tiongkok nyan hana leupah ditamong u PLTU Nagan Raya. Seubab bagah ditume uleh awak gampong.

Meunurot haba, man tujoh droe Cina nyang dikeuneuk keurija nibak PLTU 3-4 di Nagan, ditamong rot Bandara Sultan Iskandar Muda. Lheuh nyan diba ngon moto u Nagan. Teuma, awai ditupu dan dilinteung bak jalan uleh awak Gampong Langkat, Kecamatan Kuala Pesisir, Nagan Raya.

Awak gampong sinan, hana ditume peureumeun sapu. Awak nyan teumakot Cina-Cina nyan na peunyaket covid-19 nibak tuboh jih.

“Awak gampong diyu drun di rumoh, awak luwa leupah ditamong keuno. Keubit that meupalo pomerintah di Aceh,” kheun salah sidroe ureung nyang han dibi tuleh nan, teumakot na awak jak tung teungoh malam.

Lam bhah nyan, Waki Keutuha DPK Nagan Raya Puji Hartini, nibak wartawan dipeugah bahwa man tujoh droe awak nyan kadipeugisa u Jakarta. “Ka dipuwoe keudeh u Jakarta,” kheun jih.

Puji dipeugah lom ata meuno hanjeut peubiyeu. Meunyo hana soe pakoe, singoh meu ulang lom. Keu awak PLTU, Puji dilake bak pomerintah untuk dipeuingat manajemen. Di likot nibak nyan, pomerintah suwah lake data jumeulah awak keurija, nan seureuta alamat.

“Suwah pareksa dan tilek beupah. Nyoe hanjeut peubiyeu,” kheun Puji. []