ACEHTREND.COM,Lhokseumawe- That meupaloe, F (34) ureung inong asai Pirak Timu, Aceh Utara, keunong peulaku uleh MR (22) agam muda asai Syamtalira Aron. Awak nyan dua meuturi bak Facebook, lheuh nyan meujanji jak jép ie sikutang (bandrek-red) u Lhokseumawe.
Peujabat Siat (Pjs) Kasatreskrim Polres Lhokseumawe Iptu Rezki Kholidiansyah, Seulanyan (11/5/2020) dipeubah, nibak mula dua awak nyan meuturi bak Facebook. Lheuh nyan dimeujanji meurumpok. Nibak uroe Jumeu’at nyang ka u likôt (8/5/2020) si MR dijak tung F di dairah Simpang Mulieng, Aceh Utara. Dari sinan awak nyan dua dijak u Lhokseumawe jak jép ie sikutang.
Lheuh jép ie sikutang dan pajôh sikrak dua krak bada seu um, dua awak nyan jak wét-wét u Jalan Elak. Teuka di dairah seungu, si MR sigra diraba-raba tubôh si F nyang seupatôt jih ka wajeb dihôi cut kak, kareuna awak nyan dua jiôh that seuliséh umu.
Meuban dijak mat-mat badan jih, F teukeupak dan sigra dilawan. Rupajih MR dari awai kana rencana laen. Kareuna hana ditume peulaku sengklek, sigra dirupah si F dicok meuh yang disok keu gleung jaroe. Lheuh nyan si MR diplung seureuta dibaplung Honda Scoopy wareuna itam ata si F. Hape OPPO A5S ata sinong nyan ditume baplung cit uleh agam budôk antôk nyan.
Kareuna ka keunöng olah bak teungöh jalan, si F hana dipeutrép. Sigra dipeugöt laporan nibak polisi.
Bak poh 01.00 WIB si MR dibeureukah uleh polisi, Senin (11/5/2020). “Jino si MR ka meuhasé didrop uleh polisi,” kheun Kholidiansyah.
