Teunuléh Muhajir Juli
Calitra nyoe ulôn tuléh keulayi, meuseubab na hai ganjé di Aceh lam dua uroe nyoe. Bhah ganjé nyan nakeuh Touring Moge Hari Damai Aceh ke-15, yang dipeugöt uleh Badan Reintegrasi Aceh (BRA). Uleh Keutuha BRA Sayed Fakrurrazi, neupeugah bila but balap-balap Harley nyang lazem dikheun motor gede (moge) dari Aceh Tamiang u Banda Aceh, Jumeulah peng APBA hasé refocusing thon 2020, yang dipakek keu “khauri lambông-lambông keupiyah” nyan nakeuh 305 juta rupia leubeh bacut. Kon siminip.
Ulôn keumeuneuk calitra, dilè di Bireuen na sidroe aneuk ureung kaya yang na honda stoom. Seubeutuoijih nan aseuli geureutan meusen dua boh bhan nyan nakeuh Harley Davidson. Kareuna su keunepot yang bida deungon keunepot honda biasa, maka geutawôk deungön nan honda stoom. “Stoom! Stoom!” meunan su jih. Kon brum!brum! Su brum-brum nakeuh ata ureung yang golom kaya.
Pu teuma yang meunarék dari aneuk ureung kaya nyan? Sipanyang thôn dibalap honda ateuh aseupal itam, hana tom na yang teunak. Sipanyang jalan ureung geudöng geujak preh aneuk muda nyan lewat. Ureung gampông galak that bahwa di sagoe ureung nyan na ureung kaya yang ék bloe honda stoom.
![Nisan tinggalan sejarah yang memberikan dokumen penting tentang rekam jejak keagungan peradaban Islam di Aceh di masa lampau. [Syah Reza]](https://www.acehtrend.com/wp-content/uploads/2020/09/20200930_083712-120x86.jpg)
Pulom akhlak aneuk ureung kaya nyan meuleupah mulia. Hana tom ditemeunak. Hana tom dikalon ureung laen ngon siblah mata. Asai lewat bak jalan, sira diba honda, di beuôt saleum keu yang patôt, dikhém rumeh keu yang muda-muda.
Nibak wate nyan, rap rata panteu jaga ureung gampông geupeugah teuntang honda stoom dan aneuk ureung kaya nyan. geupujoe, geuakui peuraungui jih göt that. “Jeut tung keu meulinte,” kheun Apa Din Mie Gureng Basah.
“Han cocok ngön aneuk kah. Aneuk muda nyan cocok keu meulinte lôn,” kheun Apa Raban Toke Papeun.
“Boh jôk boh bilangan, wate trôh taboh nan,” seu-ot Teungku Din Lampôh Drien.
“Dalem nyan kana tunangan. Si Raimah aneuk Ampôn Him Pulo Seuna,” seuôt sidroe aneuk muda yang duk di bineh lunceng.
***
Lam saboh neubeut nibak malam Puasa, ulôn deungö surah teuntang ureung kaya. Meunurôt gure yang surah malam nyan, sihalôh-halôh jih, yang geukheun kaya patôt, nakeuh yang ka seuleusoe keu peukara prut droe. Lam udép ureung kaya nyan yang geupiké kiban cara peubibeuh ureung laen nak bagah kaya lage gobnyan.
Ureung kaya nakeuh hamba Allah yang hana lé loba lam akai jih. Hana harök keu atra ureung laen. Yang bayeu zakeut, bayeu fitrah dan galak meuseudeukah dengön hareuta droe.
“Jadi hana patôt lom peugah droe kaya, hayeu, meunyoe mantöng taharök keu ata ureung laen. Keupu teuma tapeugah droe hayeu, tapi tip na sumbangan keu gampông, tanyoe dile döng di keu lake jatah,” kheun gure nyan.
Nibak kali laén, na lom ureung kaya di gampong lôn yang kheun meuno. “Meunyoe lage lôn nyoe, adak kupeugah hana peng, hana so patéh. Makajih meunoe, ka ulôn brie moto keu jak siar dakwah, teunte lôn pasoe minyeuk dan lôn siwa toa. Panitia tangôg bereh. Malam dakwah, bu keu rombongan teungku, suwah cit lôn tanggông meupadum boh rantang. Nyoe peukara jaga marwah.”
Lon meuturi ngön sidroe toke moto yang armada gobnyan han ek le tabileung. Geupeugah le gobnyan. “Adak pih han ék tabi leubeh, bek lé tacok ata yang kana. Geutanyoe yang raya boh sapai, krah baje hantom meuleuhob, bek tajak rupah ata yang ka dipeusapat keu ureung gasien. Male tapeugah droe kaya, hareuta meujeumba-jeumpa, Harley ubebe aneuk gajah, tapi ban keuneuk jak, ka lake peng minyeuk bak gob.”
***
Dari haba-haba nyan mandum, ulon tingat keulayi keu aneuk ureung kaya di Bireuen yang geucalitra le ureung tuha awai. Ureung yang bit-bit kaya hana c’heh-c’hoh. Hana lage ôn geurusông bak iku ase. Ureung yang bit-bit kaya na adap dan na yang geumale.
“Miseu na ureung peugah droe kaya, tapi mantöng galak that rupah tumpôk sie keureubeun bak uroe raya, nyan tanda golom kaya. Pulom wate hana meurumpök, diteumeunak han löt keupiyah teungku imum, nyan leubeh parah lom. Biasa jih kaya yang kana sajan jih ata hana beureukat. Ata gese sinoe-sidéh wate mantong na kuasa lam jaroe jih,” Kheun teungku Raman Putéh ôk, nibak saboh masa dile.
Teuma pu makna Touring Moge Hari Damai Aceh ke-15 yang dibrie beulanja sampoe Rp305 juta leubeh uleh Pemerintah Aceh? makna jih, but hanjeut keubut, cok peulakén cilet bak prut. Bak peugah haba keu leumak kupi, ka meuceumeu tangki Harley.
Ijih meuno, ureung droneuh mandum ka neutudum jumeulah peng APBA yang keunöng refocusing? Keupu peng nyan?
Sampoe ‘an jinoe, geutanyoe cuma tateupu angka Rp2,3 triliun APBA diplot keu refocusing. Teuma pu-pu mantöng item but lam refocusing nyan? Hana so teupu lom seulaén awak susôn ngon awak dinah, kanto atawa badan. Teuma, talake data nyan, peureuséh tarupah bangké bak babah ase. Hana meujan dibie. Transparansi yang disurak lam surat haba dan ateuh peudiyông acara pemerintah, dongeng ban mandum.
Tour Moge 305 juta rupia nyan, salah saboh conto cara keulola peng neugara, di teungöh rakyat aloe-ala hana meupat keurija. Pu meu nyan, peng BTT Corona 2020 yang dipeugöt keu bantuan makanan pokok, sampoe inohat uroe hana diumum lom realisasi. Ka meuho?
Brum!brum! leumak that peng minyeuk honda ditanggông lam APBA. []
Komentar